Filetes de pescada ao forno

Esta é unha receita moi sinxela, rica e bastante rápida de facer. Facíaa a tía Rosa de Pataca Brava Bravísima (que a ver se colga xa algunha das súas ricas receitas), e sempre nos pareceu exquisita!



[caption id="attachment_1208" align="aligncenter" width="500" caption="Filetes de pescada ao forno"][/caption]

(Aínda que non o parece, hai un filete de pescada debaixo, jeje...).


A pescada, evidentemente, mercámola fresca, do "pincho", e pedimos á pescadeira que lle quitara a espiña. Pódese conxelar, pero se a facedes no momento, estará máis suave e saborosa.


Ingredientes (para 5 persoas):

• 1 pescada fresca


• 2 cebolas grandes


• 3 cenorias grandes


• Sal


• Aceite de oliva

Elaboración:

1.- Limpamos ben os lomos de pescada de espiñas e peles negras. Cortamos en filetes individuais, botámoslle sal e reservamos.

[caption id="attachment_538" align="alignleft" width="300" caption="Limpamos os lomos de pescada..."][/caption]

[caption id="attachment_539" align="alignright" width="300" caption="... e dividímola en filetes"][/caption]

2.- Picamos as cebolas en xuliana, finiña, e a cenoria (lavada e sen tona) raiámola tamén moi fina. Que haxa máis ou menos a mesma cantidade de cada unha.

[caption id="attachment_540" align="alignleft" width="300" caption="Cortamos a cebola..."][/caption]

[caption id="attachment_541" align="alignright" width="300" caption="... e raiamos a cenoria"][/caption]

3.- Prendemos o forno a uns 180º. Nunha tixola, botamos un pouco de aceite e refogamos xuntas a cebola e a cenoria, ata que collan cor (uns vinte minutos), a lume non moi forte.

[caption id="attachment_542" align="aligncenter" width="300" caption="Refogamos a cebola coa cenoria"][/caption]

Cando estea, botámoslle sal.

(Este paso podémolo ter feito con antelación, e así só nos quedaría o seguinte, polo que en media hora teriamos o xantar).

4.- Nunha fonte para o forno, pincelamos o fondo con aceite e dispoñemos sobre el os filetes de pescada coa pel cara abaixo.

[caption id="attachment_544" align="aligncenter" width="300" caption="Dispoñemos os filetes na fonte"][/caption]

5.- Cubríndoos ben, botámoslle a mestura de cebola e cenoria.

[caption id="attachment_545" align="aligncenter" width="300" caption="Listo para ir ao forno"][/caption]

6.- Metemos no forno de 20 a 25 minutos.

[caption id="attachment_546" align="aligncenter" width="300" caption="Resultado final"][/caption]



[caption id="attachment_536" align="aligncenter" width="150" caption="Filetes de pescada ao forno"][/caption]

Torta de requeixo

Esta receita era a que nos facía a miña irmá maior de sobremesa cando tiña ganas, e non lembro moi ben quen lla dera. Das que teño probado de queixo cocida, esta é sen dúbida a torta que máis me gustou, e é ben fácil e rápida de facer.



[caption id="attachment_513" align="aligncenter" width="300" caption="Torta de requeixo"] [/caption]

Non me gusta facer publicidade, pero sobre o requeixo véxome na obriga de facer unha recomendación, para que o resultado sexa óptimo. Antes facíaa da marca Larsa, pero agora xa non se fabrica, así que probei con Loran, e sae estupenda. É un requeixo suave e cremoso, non como moitos que se comercializan que máis semellan queixo de Burgos que outra cousa, e non hai maneira de batelos ben.



[caption id="attachment_514" align="aligncenter" width="300" caption="Requeixo Loran"] [/caption]

Para esta receita, tamaño "familiar", fixemos o dobre das cantidades que indico a continuación. Se queredes facer un tamaño "normal", respectádeas, como nesta doutra ocasión:



[caption id="attachment_518" align="aligncenter" width="300" caption="Torta do tamaño estándar"] [/caption]

Ingredientes

• 26 galletas tipo "tostada"


• 125 gr. de manteiga


• 5 ovos


• 1 vaso de requeixo


• 1 bote pequeno de leite condensado


• 3 culleradas de leite

Elaboración

1.- Desfacemos ben as galletas (podemos usar un rodiño de madeira, ou un batedor) e botámolas nun bol para mesturarlle a manteiga derretida e o leite.

[caption id="attachment_520" align="alignleft" width="300" caption="Desfacemos a galleta..."][/caption]

[caption id="attachment_521" align="alignright" width="300" caption="... e formamos a masa para o fondo"][/caption]

Coa masa resultante, cubrimos o fondo e as beiras (ata 2 cm. de altura) dun molde redondo para o forno (neste caso, como facemos o dobre de cantidade, empregamos unha fonte do mesmo forno).

[caption id="attachment_522" align="alignleft" width="300" caption="Estendemos a masa..."][/caption]

[caption id="attachment_523" align="alignright" width="300" caption="... por superficie e cantos"][/caption]

2.- Separamos as claras das xemas para poñelas a punto de neve. Prequentamos o forno.

[caption id="attachment_525" align="alignleft" width="300" caption="Separamos as xemas..."][/caption]

[caption id="attachment_526" align="alignright" width="300" caption="... e batemos as claras"][/caption]

3.- Ás xemas de ovo ímoslle mesturando o requeixo e o leite condensado.

[caption id="attachment_527" align="aligncenter" width="300" caption="Mesturamos os ingredientes..."][/caption]

En último lugar, e con coidado para que non baixen, engadimos as claras a punto de neve.

[caption id="attachment_528" align="aligncenter" width="300" caption="... e incorporamos as claras"][/caption]

4.-Botamos a modo a mestura no molde para o forno.

[caption id="attachment_529" align="aligncenter" width="300" caption="Listo para cocer"][/caption]

Cócese no forno a lume lento (175º) entre media hora e 40 minutos (comprobamos cunha agulla fina de calceta que non estea cru: debe saír limpa logo de pinchala na masa).

[caption id="attachment_530" align="aligncenter" width="300" caption="Resultado final"][/caption]

Albóndigas de carne

Así as fai a miña nai, e así son como me gustan (non soporto as prefabricadas!). Levan relativamente pouco tempo (como moito unha hora), e se sobran poden conxelarse racións para días posteriores nos que se come só/a.

 

[caption id="attachment_485" align="aligncenter" width="300" caption="Albóndigas de carne"] [/caption]

A carne picada debe ser de tenreira, ou en todo caso dun tipo só. Eu antes mesturaba tenreira e porco a partes iguais, ata que un carniceiro da praza de abastos de Pontevedra me deu unha clase moi ben dada sobre por que non se debía facer iso. Antes facíase, sobre todo, para aforrar en tenreira, que era moi cara. Basicamente, argumenta este amable profesional que as carnes teñen momentos de putrefacción diferentes, e que unha (o porco) deteriora a outra (a tenreira), sobre todo no desconxelado. Ademais, quedan máis ricas. Por suposto, agora fágolle caso. Grazas!

Ingredientes (para 3 persoas):

• ½ kg. de carne picada (de tenreira)


• 1 cebola grande


• 2 ou 3 dentes de allo


• 1 ovo batido


• Miolo de pan reseso ou pan relado


• Pirixel


• Pementa branca


• Fariña


• Aceite de oliva


• Sal


• 1 vaso de viño branco

Elaboración

1.- Nun bol, mesturamos a carne co ovo batido, un pouco de miolo de pan reseso, allo picadiño, pirixel, pementa branca moída e sal.

[caption id="attachment_493" align="aligncenter" width="300" caption="Preparamos a carne"][/caption]

Formamos con esa mestura bolas, e ímolas enfariñando.

[caption id="attachment_494" align="alignleft" width="300" caption="Formamos as bólas..."][/caption]

[caption id="attachment_495" align="alignright" width="300" caption="... e imos enfariñándoas"][/caption]

2.- Quentamos abundante aceite nunha tixola e imos fritindo as albóndigas, un pouco por cada lado.

[caption id="attachment_499" align="alignleft" width="300" caption="Fritimos as albóndigas..."][/caption]

[caption id="attachment_500" align="alignright" width="300" caption="... un pouco por cada lado"][/caption]

3.- Picamos a cebola, e nunha pota na que collan as albóndigas, botamos catro culleradas de aceite e fritimos a cebola ata dourar.

[caption id="attachment_502" align="aligncenter" width="300" caption="Pasamos a cebola"][/caption]

4.- Cando as albóndigas estean, ímolas botando na pota.

[caption id="attachment_504" align="aligncenter" width="300" caption="Botamos as albóndigas na pota"][/caption]

Engadimos o viño, auga que lle chegue cando menos á metade e un pouco do aceite de fritilas (eu tamén lle boto os restos sólidos que quedan ao coalo).

[caption id="attachment_503" align="aligncenter" width="300" caption="Engadimos viño e auga"][/caption]

Deixamos que ferva unha ½ hora a lume lento, remexendo de cando en vez para que non se peguen.

[caption id="attachment_488" align="aligncenter" width="300" caption="Resultado final"][/caption]

5.- Este prato pódese acompañar de arroz en branco, cuscús (ver receita do "Choco na súa tinta") ou patacas fritidas, cortadas en cadradiños. Ás veces fágoas con ondulacións (sobre todo cando comen nenos/as, que lles gustan moito), e como sempre hai alguén que me pregunta como se fan, aí volo mostro. Hai que ter un utensilio que as corta coa forma:

[caption id="attachment_489" align="alignleft" width="300" caption="Co cortador..."][/caption]

[caption id="attachment_490" align="alignright" width="300" caption=".. imos dándolle a forma desexada"][/caption]

6.- Botámoslle sal e fritímolas en abundante aceite ben quente.

[caption id="attachment_505" align="alignleft" width="300" caption="Botámoslle sal..."][/caption]

[caption id="attachment_506" align="alignright" width="300" caption="... e fritímolas"][/caption]

Marisco

Para cocer o marisco hai que ter en conta o seu tipo e tamaño e se está vivo ou non. A min pásame a miúdo que nunca sei o tempo que hai que darlle a cada variedade, e como supoño que lle pasa a máis xente, decidín colgar os trucos que uso para cada un, e para o marisco en xeral.



[caption id="attachment_468" align="aligncenter" width="300" caption="Mariscada"] [/caption]

Irei engadindo máis variedades, en función de que as vaia comendo ;-)

Ingredientes:

• Marisco fresco


• Auga abundante


• Sal abundante


• Unha póla de loureiro (opcional)

Tipos e tempos de cocedura:

• Boi: 15/17 minutos (dependendo do tamaño)


• Caramuxos: 5 minutos


• Camarón: 1 minuto


• Centola: 15/17 minutos (dependendo do tamaño)


• Cigalas: 1/3 minutos (dependendo do tamaño)


• Gambas: 1 minuto


• Nécoras: 7/10 minutos (dependendo do tamaño)


• Percebes: 4/5 minutos (dependendo do tamaño)

Elaboración:

1.- A auga que se bote na ola para cocer o marisco dependerá de se este aínda está vivo ou non. Se está vivo, botarémolo coa auga fría, e contaremos o tempo a partir de que comece a ferver. Se o marisco está morto, botámolo coa auga xa fervendo, e contamos a partir de que volte a ferver. (Isto faise así para que non se lle desprendan as patas na cocedura).

2.- A auga salgámola ben e poñémoslle unha boa póla de loureiro.

[caption id="attachment_473" align="aligncenter" width="300" caption="Nécoras e cigalas"][/caption]

3.- Unha vez cocido, se queremos conservar o marisco, o mellor é envolvelo nun pano mollado coa mesma auga de cocelo, e metelo na neveira (ou conxelalo así). Sempre é mellor cocelo vivo e gardalo despois, que esperar a que morra e cocelo no momento.

[caption id="attachment_470" align="alignleft" width="300" caption="Camaróns"][/caption]

[caption id="attachment_471" align="alignright" width="300" caption="Boi e camaróns"][/caption]

Choco na súa tinta

Receita da miña nai, máis ou menos. Nós botámoslle moita cebola (case é "choco encebolado"), e soemos acompañalo de arroz en branco, pero como esta semana xa tocara un rico arroz elaborado polos cuñados/as, fíxeno con cuscús, que tamén explico como facelo.



[caption id="attachment_448" align="aligncenter" width="300" caption="Choco na súa tinta con cus-cús"] [/caption]

Para mercar o choco, eu sigo o consello de que a frescura vén indicada pola tinta que trae; ou sexa, se está moi negro, está fresco, e se está branco e lavado, non o sabemos. Cando volo limpen, pedide que vos garden a tinta.

Ingredientes (para 2 persoas):

• 500 gr. de choco fresco


• 1 ou 2 cebolas (para gustos)


• Un bo anaco de pemento verde (opcional)


• 1 dente de allo


• 1 vaso de viño branco


• 1 vaso de auga


• Aceite de oliva


• Sal


• Pirixel

Para o cuscús:

• 1 vaso de cuscús


• 1'2 vasos de auga ou caldo


• Pirixel (opcional)


• Sal

Elaboración:

1.- Lavamos ben o choco, separando e reservando a tinta para unha cunca.

[caption id="attachment_451" align="alignleft" width="300" caption="Lavamos o choco..."][/caption]

[caption id="attachment_452" align="alignright" width="300" caption="... e reservamos a tinta"][/caption]

2.- Nunha tixola e tres culleradas de aceite, facemos un refrito coa cebola, o pemento e o allo.

[caption id="attachment_453" align="aligncenter" width="300" caption="Facemos o refrito"][/caption]

3.- Cortamos o choco lavado en anacos non moi grandes. Cando a cebola estea algo transparente, engadímolo ao sofrito e dámoslle unhas voltas (veremos como vai cambiando de cor e textura).

[caption id="attachment_454" align="aligncenter" width="300" caption="Engadimos o choco"][/caption]

4.- Collemos a cunca coa tinta e baleirámola dos "saquiños", retirando os restos de bolsa.

[caption id="attachment_456" align="aligncenter" width="300" caption="Preparamos a tinta"][/caption]

Imos engadir no refrito o viño e máis a auga, así que para que a tinta se disolva ben podemos botar primeiro un dos líquidos sobre ela, e logo mesturalo e á tixola. Botamos o sal, e deixamos que coza a lume lento ata que o choco estea brando (unha media hora).

[caption id="attachment_457" align="aligncenter" width="300" caption="Cocemos o choco"][/caption]

Cando estea, botámoslle o pirixel.

[caption id="attachment_463" align="aligncenter" width="300" caption="Resultado final"][/caption]

5.- Para o cuscús, botámolo nun prato fondo co pirixel picadiño.

[caption id="attachment_458" align="aligncenter" width="300" caption="Cuscús"][/caption]

6.- Fervemos a auga, botámoslle sal e vertémola sobre o cuscús, que taparemos uns 5 minutos para que inche. E xa está listo!

[caption id="attachment_460" align="alignleft" width="300" caption="Vertemos a auga salgada"][/caption]

[caption id="attachment_461" align="alignright" width="300" caption="O cuscús feitiño"][/caption]