Paspallás en escabeche

Outra versión para os paspallás, máis arriscada, pois os/as comensais acostuman sorprenderse co sabor. Tamén é unha receita que fai a miña nai en días de festa, sacada dun libro de cociña clásico, El mundo de la cocina, pero coas súas propias achegas, claro (ademais de que no libro preparan perdices).



[caption id="attachment_422" align="aligncenter" width="300" caption="Paspallás en escabeche"][/caption]



Pódense tomar quentes ou en frío, e comezaremos a preparala como a outra receita de paspallás deste blogue.

Ingredientes (para 6 persoas):

• 12 paspallás


• 10 dentes de allo


• 1 cebola


• 1 vaso de auga


• Viño branco


• 1 vaso de vinagre


• 3 cenorias


• 3 cravos


• Loureiro, pirixel


• 10 grans de pementa negra


• Aceite de oliva


• Sal

Elaboración:

1.- Poñemos os paspallás en adobo o día anterior. Para iso, limpámolos ben de plumas e lavámolos. Nunha pota, botámolos xunto co allo picado (4 ou 5 dentes), pirixel, loureiro e abundante viño branco. Como este non mollará todo o contido, procuraremos remexelos de cando en vez.

[caption id="attachment_164" align="aligncenter" width="300" caption="Paspallás en adobo"][/caption]

2.- Nunha tixola con abundante aceite, douramos os paspallás polos dous lados e reservamos.

[caption id="attachment_165" align="aligncenter" width="300" caption="Dourámolos en abundante aceite"][/caption]

3.- Nunha pota grande, imos pochando con aceite de dourar as aves a cebola non moi pequena, os allos enteiros (uns 5) e a cenoria en rodaxas. Botamos un vaso de viño branco e outro de auga, os paspallás e os demais ingredientes. Facemos todo moi ben, remexendo para que non se pegue, ata que as aves estean tenras. Engadimos o sal.

[caption id="attachment_421" align="aligncenter" width="300" caption="Fervemos todos os ingredientes"][/caption]

Nota: Podémolo facer dun día para outro, servíndoos fríos, ou conservalos máis tempo nun recipente no que o líquido cubra ben os paspallás e botándolle aceite sobre a superficie.

[caption id="attachment_424" align="aligncenter" width="300" caption="Resultado final"][/caption]